ROMANO CENTRO Nr. 34, 09/2001

< zurück | Deutsch

O Fonohazo

katar o Beas Lakatos

Sas ka nas, bachtala Devla, t'al amenge kadi rat bachtali. Te žutij ame i sunto Marja, lungo trajo te del ame o Del! Sas ek fonohazo. Ande kodola šukar rakla sas, savi, savi maj šukar sas, taj igen, igen, igen šukar rakli sas. Jek, sakona sas piramno, feri savi maj šukar sas, kodola nas piramno. Taj phenel kadeta: "Devla, baro t' al tjo hatalmo, so t'al kate?" phenel, "Me sim maj šukar kate ande kado fonohazo taj man naj piramnjo? " No taj phendas kade: "Vaj Benga vaj Devla, vi man de jekhes!"

Taj pe kodo las, kana kado phendas, taj pe kodo las, no taj pe ratja gelas late ek manuš. Nojo kana kodo manuš gelas kote late, hat o udud tele phurdas mindjar: "Devlesa rakhav tu, muri kedvešo piramni!" phenel. "O drago Dejl andas tu!" phenel, "muro piramno", phenel. Hat vorbij lasa, vi kako vi kuko la rakljasa, nojo taj lel pe kodo, kana avilas o časo aba taj vi phenel. "De me si te žap-tar, Devlesa mukap tu! žap-tar", phenel kade. "No ža!" Taj las i rakli, pe kodo cirdas opre i lampa, udud taj dikhel: Naj khonik ando kher. No godjaver rakli sas, phenel kadeta: "Mur' Devla, baro t'al tjo hatalmo. Sostar kate kadi butji?" phenel kadeta. "Me inke či dikhlem lesko muj! Hodj če piramno si man", phenel. "De ka Dejl dela ma", phenel kadeta, "žo-tar me ka 'k tudošo gajdži."

Nojo taj gelas ka ek tudošo gajži taj phenel lake: "Manušnje!" Phendas lake sogodi i rakli, hodj: "Muro piramno, kana and' avel, me lesko muj či dikhav. Či dikhav les, sar-i vaj so-i, hodj če manuš-i, mindig tele phurdel o udud." - "No muri manušni" phenel lake i phuri gajži, i čochaj-i. "Ek vareso efta berš, taj efta šon, taj efta kurke, taj efta sempilantaša fonindan, kodo thav phande, kana avela tute pe ratja, phande pe lesko punro taj maj dikhesa, phandavesa, žanesa, hodj kon-i kodo." šunes, i phuri gajži phendas la rakljake. No taj las i rakli mišto-j. Avilas khere, avilas kodo časo, hodj kodolako piramno gelas kote late. No kana gelas late phenel: "Devlesa rakh-" na, či phendas, "Devlesa rakhav tu!" Kodo gažo: "Avilan?" - "Avilem!" Taj lel pe kodo taj cirdel o udud tele, vorbij lasa, kamel la, čumidel la, la raklja. I rakli či dikhel lesko muj so-j. No katka i rakli, so phendas lake i phuri gaži, pe kodo ašilas, taj las, asanas kernas taj las i rakli šukares taj phanglas pe lesko punro o thav, šunes? No i rakli pe kado: "De žap-tar, muri piramni!" phenel kade, "szemen szép szérelme. žap-tar!" - "De ža!" phenel kadeta.

No kana gelas, hat i rakli katka o thav pe lesko punro žal, žal, i rakli pale chutjilel les, žanes, kodo thav, kodo baro kecavo gumbolego sas. Hat, šavale, te phenav tumenge, taj lel i rakli mindehol palal žalas, pala leste, hodj so kerel, hodj kaj žala lako piramno. No žal pala leste, ka žala, ka niči? Ande murmunci. No mulo, beng sas kodo! Ke benges pomenindas, kana maj anglal phendas. "Me sim maj šukar, taj či dan ma, benga vaj Devla!" Le benges pomenindas, na le Devles, te pomenil le Devles, udje, i paramiča maj dur či gelo ...

Sar kadi paramiča źal maj dur, šaj gjinaven ande nevi kenva "Te na dikhas sunende... Lovarenge paramiči, tertenetura taj gjila" (Drava-Verlag).

Foto: Nada Duždová, Jarovnice

ROMANO CENTRO Nr. 34, 09/2001