ROMANO CENTRO Nr. 34, 09/2001

< zurück | Deutsch

Školako ažutimos plala Řomane śavořê ande Slovakija

Amen geljam ande Istočno Slovakija te dikhas kakala škole, savengê anzardjam paluno bêrš financijsko ažutimos. O uspexo le projektosko sas desja baro: Sja la školakê direktorja kêrde maladi bući. Vorta ande jek škola, ande savi źan 420 řomane śavořê, sas pařuglimos pe but maj laśi sama: La školakê sobe, kaj sas maj anglal tunjarić thaj desja tristo sas akana ande but šukar boje thaj but šukares dićhonas. Akana sî le śavořên maj laśi šansa kaj sî le materijali te ramon thaj sićon. O materiali la školako kaj ćinde, aśel pe laśo than thaj sî kon lel sama lestar. Le śevoře but laśes sićon sar trobun te len sama kata 'l cîne śavořê, te pravaren le, te najaren le, te paćaren le. Sa kodja sićon pe khêlimaskê lutke thaj pe papuše. Kon kamel šaj sićol te khuvel košnice. Le učiteljur mothon, kê sî but važno te dićhol kodja, te źal e bući maj angle. Importantno sî, kê akana sî le školako sîkavimasko materiali, savo del le śavořên bari motivacija haj akana arakhas ande školakê sobe vi vužê parne lavabur kaj šaj xalaven le śavořê vi peskê vas. Kana dikhlja o šêrutno le forosko, kê thode manuš anda zapado sama pe kodja škola, vi vov korkořo pestar teljarel akana te thol jek nevo gazosko taćarimos ande škola.

Maj jek baro uspexo sî vi kodja: Kata "Caritas Graz" rodjam ažutimos pala 'l škole. Voj dja peśći vorba kaj kam lel sama pe jek škola kata le trin škole kaj dikhljam le ame źi akana. Aj sî ame nada, te astaren duj Austrijakê škole kontakto thaj vortaćija kodole do avere školenca. Kodola cîne lovořê, kaj śinavel e Slovakija kodole školengê, dabi arêsen te poćinen e struja, o taćarimos taj o telefono; pala školako materiali či maj aśên čisoskê love. Le učiteljur save sî len volja te sîkaven le śavořên ande 'l čořê Řomengê škole, butivar kêren taj poćinen la školako materiali korkořo pestar. Von sî desja angažuime haj rado bi kêrenas vi palamizmeri programur pala 'l śavořê. Numa pala kodja čisoskê love naj! E poćin le učiteljonđi sî kadići cîni, kê sî te roden peskê palamizmeri maj jek aver bući. Te del o Del, te avel o djes, te šaj arakhas vuni učiteljongê jek cîni poćin, te šaj te kêren bući êl śavořênca vi palamizmeri, te đilaban, te khêlen le śavenca thaj te sîkaven lengê vi vasteśći bući te kêren.

Sa kodole śavořêngê šaj ažutis vi xurde lovenca. Anda kodja maj jeg data řuđis tumen pala ažutimos. O numero la bankako: 00671 106 540 Bank Austria, BLZ: 20151

Fotos: D. Jevremović, M. Karoly, Zakladna Skola Trebisov

ROMANO CENTRO Nr. 34, 09/2001