ROMANO CENTRO Nr. 30, 09/2000

< zurück | Deutsch

O Panžto Maškar-Themutno Kongreso kata Romani Unia

Kata 24.7. źi ka 28.7. înkêrdilo ande Praha o 5. Maškar-Themutno Kongreso kata e Romani Unia. E IRU sî e maj puraji maškar-themutni řomaji organizacija. Lako statuso ka UNESCO sî konsultativno. Kata o 4. kongreso źi akana nakhli but vrjama, aj o ašundimos la Romana Uniako źi akana nas prja laśo. Kaća vrjama nakhli. O purano generalno sekretari anzardja le 300 Řomengê, kaj sas delegatur anda 37 thema, le neve statutur. Pala kadala neve statutur kam înkêrdol kogreso svako štarto bêrš. Nevo sî vi o Romano Parlamento. Ando parlamento kam avel po jek poslaniko anda svako them, nevi sî vi jek Romani Kris.

Alome sî o presedniko Dr. Emil Sćuka anda Čexo. Vicepresidentur sî o Viktor Famulson, švedo, o Stanislaw Stankiewicz, Polska, e Nadežda Demeter, Rusija taj o Florin Cioaba andaj Rumunija. Generalno sekretari sî o Xristo Kychukov, Bulgarija, o kasiri sî o Zlatko Mladenov, Bulgarija. Po paluno djes le kongresosko înkêrdilo o angluno ćidimos le Romane Parlamentosko. O šerutno le Romane Parlamentosko sî o Dragano Jevremović, Austrija. Sja le delegatur losarde pala leste, nas či jek glaso kontra. O Emilian Nicolae, Rumunija, alosajlo pala zastupniko le šerutnesko. Pala kodja sas nominacija le članongê kataj Romani Kris, taj nominacija kata presidijumo, kaj sî les komisija palaj śib, komisija palaj medije, komisija palaj informacije taj kadja maj dur. Sas inja bućakê grupe: paj řomaji śib, paj situacija le Řomendji ande Kosova, pa holocaustfondo, paj migracija, paj ekonomija, paj edukacija taj pa `l medije. Pa sja kadala teme kam aźukêrel le Řomen kata o presidijumo bari bući.

O 5. Kongreso kata IRU thodja neve sêmnur taj dja odluka te ćidel sja peśći zor te avel le Řomengê jek manušikano trajo, te vazdel o školuimos le Řomengo, te vazdel o intereso le gaźengo palaj řomaji sama, te bufljarel o intereso kata `l maškar-themutne organizacije palaj Řomendji sama taj te řudjil pala lovengo aźutimos. E IRU kam ćidel sja peśći zor te aven sa êl Řom jek. But mišto bi avelas te phanden pe vi kodola řomaja organizacije la Romana Uniasa, kaj źi adjes înkê naj phangle lasa.

E Romani Unia zastupil le Řomen anda 37 thema. Mišto bi avelas te phandel pe vi o "Roma National Congress" la Romana Uniasa, te kêren khêtane buci pe laśi řomaji sama.

Photo: M. Heinschink

ROMANO CENTRO Nr. 30, 09/2000