ROMANO CENTRO Nr. 29, 06/2000

< zurück | Deutsch

O Hodžas ko veš

katar e Fatma Heinschink

Isine jek hodžas. P'amalesar gelo akana ko veš ti phiren. Ka gele ti phiren akana, o amal leskoro vakerela: "Aman, Hodža!" vakerela, "Dikh savo baro veš isi! I rat athe darela dženo t'ačhel jek rat!" Akana o hodžas da vakerela: "Soske ti darel o dženo katar ko veš? Nane darajmaskiri buti!" - "Eh, ti keras adikas" vakerela akana, "adaja rat tuj ačh athe, džak ko disipe. I rat t'ačhilan adaja rat, javin i rat mej ka-dav tut vukos mi khereste, ka-kerav maseskoro xabe, ka-xas. Ama, ma t'ačhilan da, ti darasajlan, tu ka-keres xabe, me k'avav javin i rat, tute mej ka-xav." - "Eji" vakerla akana o hodžas. Ačhola odija rat othe. Sasti rat ama ačhola, talal ko rukh bešela peske, sasti rat ačhola.

Javinaskoro dives avela o amal leskoro, dikhela: O hodžas othe. Talal ko rukh bešela peske. "Eh, Hodža!" vakerela, "ačhilan sasti rat?" - "Eji, ake ačhilom!" vakerela. "Ama, vaker o dovrus," vakerela, "hidžek šafki na dikhlan?" - "Oh, athe sine šafki, ama isi belki pandž šel kilometra dur, jekh kher, jekh kaliva. Ama aboka dur thaneste, dikh othe isi jekh kher. Leskoro šafki dikhlom dural, katar ki pendžerka; ka phabarde lampa, leskoro šafki dikhlom." - "Tuj našadan o xabe! Akana mukavas ka-xas tute." - "Ah, soske?" vakerela o hodžas. "Sar, soske? Tuj othar athe o šafki avilo tuke, oduleske na darasajlan. Tuj ko šafki sinanas, adaja rat!" - "Eji" vakerla akana o hodžas.

Lena pes, džana khere, o hodžas sovela peske pi khereste, tamam akana, lela t'arativol. Lela ek kazani, džala, umlavela les ko rukh. tala ko kazani phabarela jekh memeli, čhuvela andre pani, fasulja, bekledinela akana ti tavdjol, o xabe. Vov ko kher bešela, avela akana o amal leskoro. "Eh, Hodža!" vakerla, "Kaj o xabe?" - "O xabe tavdjola. Beš! Bekledinas, o xabe tavdjola." Amal leskoro akana bešela. Bešela, bešela, bešela, nakhela ek sahati. "Ah, Hodža, kaj o xabe?!" - "Tavdjola." Pale bešela, pale nakhela ekh sahati, duj sahatja. Avilo dešuduj i rat. O xabe nane! - "Ah, re Hodža!" vakerela, "Ušti ti dikhav adava xabe! Savo xabe si, džak akana na tavdilo!" - "Hajde, phir," vakerela akana o hodžas. Lela, gelela les ko bahčes avri ki avlin. "Ake o xabe: Tavdjola." Akana o amal leskoro ka dikhela: "Hič adava kazani adale memeljasar tavdjola athe adava xabe!" vakerela. "Eh, re dilineja!" vakerela akana o hodžas: "Panč šel kilomatra dural o šafki avela da, athar adale memeljasar sar ma ti tavdjol adava xabe?" - Othe ka sinomas, athe avilom.

"Panč šel kilomatra dural o šafki avela da, athar adale memeljasar sar ma ti tavdjol adava xabe?"

Photo: C. Heynen, R. Erich

ROMANO CENTRO Nr. 29, 06/2000