|
<
zurück | Deutsch
KREČUNOSKE GINDURA
katar i Ceija Stojka
O maj šukar krečuno sas mange, kana muri famelija sa inke kathe sas, muro šavo Jano, mure šavora. Či trobujas ame but, feri e famelija t'avel khetane. Kodo pe svunto ratji sas. Kodi ratji atunči kiravos muro horezo taj pekos e khajnan, e papinan, e racen, o but mas, e but zuma, e but šelati, e pekimatura, e kolakura. Tele folinas kadaj mesali, čačes, tranda-taj-du berš! Taj e šavora khelenas taj djilabenas, du djes mindig khelenas katkake, hod čačes i luma phabolas, lengi sas i luma!
Akank pe kadaja svunti djes tranda-taj-du berš simas e Kalmanesa. Tranda-taj-du berš folindas e mesali tele e kerajimasa. Kutka avral si ma pira, so muro šogoro kindas mange ande Ungro, si panžvardeš liti e šaxenge, e aver si tranda liti, taj kothe keros mindig o galbeno horezo ande, o romano.
Kado berš č'avla khanči. Kado berč ando džaso sim. Či kamav mure šavora, te hatjaren kado. Mure šavora te keren e Ježusasko šukar djes, taj me šuno lenca, bešo lenca taj dikho lenca. Taj khere sim mange. Aven mure šavora kathe vaj me lende žo. Pala tranda berš, kathe ande kado vonungo pala dešinja beršen, si angluni svunto ratji, ka č'avla khanči kathe. De kado si o trajo, na?!
 Šoha či gindindemas, pelas kodo, hod muro romesko časo avilas. Mulas. Aba vo inke kathe si.
Me phenav tumenge, sako manuš, kana žal-tar pa kadi luma taj avel pi luma, kodo manuš varikana pale avel pi luma, ke khate si. Taj ande kadi golovo luma vi o brišind so del, vi o paji so si ande tengera, vi so si e rup, e somnakaja taj sogodi, so avri len andaj phuv, palpale žal, taj varekana pale avela. Ke našti phenes, hod pa avere čerhaja folij kathe paji ande. Amaro paj, so si pi cara luma, opre žal e felhevosa, kana si o baro tatjimo, cirdel pe o felhevo ketane, i mulha, taj žal opre. Taj varikana avre thane pale del o brišind tejle. Kadej sam v'ame manuša. Ame avas taj anda ame avel pale avri ande duje šele beršen vaj ande šele beršen vaj ande 'k aver djejs pale kodo. Ke ame trajinas taj kodo trajo pale ande 'k aver avel avri. Feri na kadala godjasa, avera godjasa pale, avere gindonca. De pale kodo manuš. Taj kodo bistošan si, ganz sicher si, me te mero, angluno si, muro šavo dela ma o vast, o Jano, taj muri dej, taj o Kalman.
Taj šaj pakjan, hod o Kalman mulas, kodo čačes, lesko mas avri igerde, tele šute les, de leski odji taj lesko kamimo, kodo kathe si. Khere si. Taj vi muro šavoro khere si, taj vi muri dej khere si. Taj kana merel o manuš, žanel o Del ka žal opre, kathe mindjar pra amende, pra amende. Taj ame te merasa, me te mero hundertprozentig pale ka muro nipo avav, taj varikana slobodo avla amenge, pale tele te avas.
 Me sako djes vi nasula sune si ma, ke vi nasul trajo sas ma, de šejori, de kodoj nasula sune, so si pa KZ, kodola sa opre lav, cajxnij le e klajbasesa. Opre uštav taj kodo bildo kerav, hod te ašol kodo suno.
Taj avera sune, avel muri dej, avel muro šavoro, avel o Kalman taj djilabel mange, aj phenel mange: "Na dara, šej!" Taj našti phenav, hod dar si ma vaj me darav, ka korkori sim. Ke vo aminti lel pre ma, na dar del ma, hamen aminti len prej ma. Taj kana biris kadej, kodi Einstellung t'avel tu, te šos tu kadej ande ando trajo, atunči pačasa žanes te trajis vi korkori. Ke či san korkori!
Sako djes dikhav vi mure šaves. Avel taj asal taj djilabel, avel mura phenasa a Micasa. Kodi aba biš-taj-štar berš si, kodi aba mulas. De kana aven, mindig šukar-i, terne. Taj biš-taj-štare, biš-taj-panže beršenge. Taj šon pe kothe taj djilaben.
But avel pe kodo sar tu san manuš. Hod mukes tu, trajis tu tje manušenca, so tusa jokhar varekana trajinas, taj či bistres le, ande tjo jilo, ande tji godji ašon, taj gindis prej le. Atunči naj tu problema, hod te na aven, ke ande mukes le. Si manuša, but manuša, so me žanav, ande Ungri, kodola na inke pe murmunci te žan. Amende kodo naj, taj ame či daras amare mulendar. Taj me vorbinav mure romesa, sako djes phenav leske: "Dikh-ta, katka muklan ma akana, kado tecij tuke? Ka bešes? ka san?" Vorbij lesa. Phenav leske: "Le aminti prej ma, kutka taj kutka žav! De žal mišto, vi kadej kathe san. Xutil ma!" Taj kana žanes kadej te trajis, kodole manušes či bistres, či šudan, lesa trajis, tje niponca trajis.
Pala tranda berš
si angluno svunto ratji, ka č'avla
khanči kathe ...
Photo: Renata M. Erich
ROMANO CENTRO Nr. 23, 12/1998
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
