|
<
zurück | Deutsch
I baxtasar i godi
katar ki Fatma Heinschink
I baxtasar i godi arakhindile. Akana vakerna: "Tuj kon isinan?" Okoja vakerdas: "Me isinom i godi. Tuj so isinan?" "Mej da isinom i baxt." "Hajde", vakerdas i baxtasar i godi, "ti džas, ti dikhas, kaske si lazimi, ti das les hem godi hem bax." T'aven ke duj eke dženeste. Linde pes akana i baxtasar i godi. Džana t'arakhen eke bibaxtale dženes, bigodjakere dženes rodena. Džana, džana, džana, džana, džana, džana eke gaveste, pučhena: "Kon isi athe bibaxtalo, bigodijakoro?" "Nane", vakerena. "Ajde xani adže ti džas."
 Ka džana, nakhela ek guruvongoro arabas katar ko drom. Ka nakhela akana i godi ačhola akhate, i bax ačhola akhate, akatar nakhela arabas. Akana i bax dela vukos i godiake: "Godije, le tut agore!" Ama i godi šaširdinela, kana ka lel pes agore, čhuvela pes k'arabaskoro tekerleki. I godi mučhardivola, merela.
Akana i baxtasar i godi uladivona. Akana adava sevepi isi: Jek dženo, ka si godjaver, isi bibaxtalo, bax nane les. Kas isi bax, godi nane les. Isi dženeste godi si, isi dženeste bax isi. Ke duj eke dženeste phares t'arakhes. Othe ka sinomas, athe avilom.
"Ġilabavas jek ģili, so amenca sas, numa naštiv,
lavutasa bi mothavas so amenca sas, numa naštiv,
kê phuro sim, izdran muře phure vas ..." (Dragan Jevremović)
Photo: Renata Erich
ROMANO CENTRO Nr. 22, 09/1998
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
