|
<
zurück | Deutsch
E ROM TAJ O BENG
katar i Ceija Stojka
Jokhar phangle ekhe Romes, taj gele trin Romna pe raća ando baro veš po kerestruto drom taj line i paluni rota anda vurdon avri taj mukenas la, plajeske tele taj opre pe kodo baro kerestuto drom. Mangenas e benges te avel avri, hod te žutij le, te muken e Romes, so phangle les. Po but, po but, kana i rota katar i jek phuri Romni ka i aver Romni žalas, avilas o beng avri andaj phuv. "So kamen tume mandar? Soste či den ma pača?" "No šun akanik benga, so mangas tutar: Amare šaves phangle, taj e šavora roven, naj le te xan, taj naj kon tradel e grastenca. Si te žutis, e Romes te muken avri!" "Aj so dena ma tume pre les pe kodo?" "So mangesa benga, kodo das tu, feri t'avel o Rom avri andaj temlica, ka phanglo-j. E gaže šute pre les, hod grastes čordas."
 Aj phenel o beng: "Mišto-j Romnale, žan khere taj lešin pe deteharin, kana o bašno anglunes kezdija te kukurutij. Katar kodo dopaš časo khere avla tumaro šavo. De so dena pe kodo, me te kero tumenge kado?" "So manges amendar benga, raja, ćo barimo?" "Me mangav kodoj Romesko šavoro, so akanik avla les, kodoleski ogjori me mangav!" Aj kezdindas i terni Romni te rovel: "Aj soste manges mure šavores, mang aver variso!!" "Me feri kodo kamav, o šavoro te kerdjola, t'avel muro!" Taj phenel i phuri Romni: "No mišto-j, kade te avel!" …i pačanas pe kodo e phure Rom. Aj gele khere taj dine pe tele. Detehara kezdij o bašno, "kukuruku!" te cipij. No bešen e Romna po vurdon taj kon avel khere? Šolazij o Rom e bare dromeske.
Bisterde e Rom kado, tradine dur. Astarenas taj tradenas taj kiravenas taj paruvenas taj kerenas, e pe kodo bisterde so šinade. Taj avel i vrama taj žal i Romni taj kerdjol la eg baro šavo, furčavo pončo. Taj avel o kalo manuš, o beng taj phenel: "De akanik kado mange šinado-j, muro-j!" Taj phenel o beng: "Si te den les mange vaj kamen vaj niči!!" Aj phenel i šej: "Me či dav mure šavores!" Aj šingrel peske bal avri taj v'e Romna roven taj cipin: "Devla so te keras?" Po but, po but taj phenel o beng:
"No mišto-j, jek vorba dav tume 'frei'! Slobodo-j tumenge variso avri te roden!" Taj avel o phuro šavo paše thaj phenel: "Tu te šudesa o barr kadej dur, benga, sar me, atunči ćiro-j o šavoro! Taj me te šudo les maj dur, atunči muro-j o šavoro!"
Dikhel o beng po Rom taj pi familija taj po šukar šavo, aj phenel: "Pe kodo slobodo e Romenge avri kerdo, o 'Gesetz' kadej žal, hod slobodo-j lenge kado te mangen, taj si te mukav kodo. Mišto-j, kadej t'avel!" I phuri Romni das ka pesko šavo ekha čirikla ando vast. Taj o beng lel o barr. Taj lel pe eg fuga o beng, perdal pa paji, pa drom, po rito taj šudel o barr. Kadej šudel les, hod njivij o barr. Taj lel o Rom atunći, pala kodo vo avel, na?! Taj lel vo taj kezdij te našel kodoj cigne purnorenca o Rom. Taj našel, o kolopo hural, i čugni hural, taj mukel a čirikla avri taj i čirikli erekre gelas-tar, šoha č'avilas palpale. Kadej ašilas o šavoro. O beng pale das ando kalo felhevo ande. Kadi mura mamaki paramiča.
Taj avel o beng taj phenel: "De akanik kado mange šinado-j, muro-j!"
Photo: Luciano Natarini
ROMANO CENTRO Nr. 20, 01/1998
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
