|
<
zurück | Deutsch
PARAMIČ LA PHURJAKI HAJ LA BUZNAJAKI
katar o Lev Čerenkov
Sas pe kaj nas-pe te ni aelas-pe, ni motholas-pe. Sas ande'k them dur-dur kathar, inkjal efta paja le bare jeg Rrom phuro, kaj trajilas pe phurjasa haj pe śavenca le însurime, detot čorrês trajilas. Êg data gêli i Rromni i phuri po drom aj arakhljas êg lovorro xarkuno. Aili khêre haj mothol êl phurêskê: "A phurèa-na! Hajdi ka-kinas amengê 'g buzni, aela sosa te pravargjon amare nepoc". Kêrde sar kêrde, gêlo o Rrom o phuro, andjas khêre'k buzni, thodjas la ando hambaro.
De diminjac ael e Phuri te došêl la, ta i Buzni ni del la o thud lakê haj mothol: "Ni daua tut o thud tukê pîne ni phandaesa le grapi ande'l zîduri, kê phurdel i balval andrê thaj darau te trohnisavau haj te nasvavau".
 Gêli i Phuri kau Bakro: "A Bakrèa-na, de ma cîrra pošom mangê, kaš te phandavau êl gropic ande'l zîdurja le hambaroske, te na phurdel i balval andrê, kê te na nasvaol mîrrî Buzni thaj ka-del ame thud amengê".
O Bakro mocol: "Ni dau tu pošom tukê, kê nič me ni kamau te šudrjuvau nangê morkjako!"
Gèli i Phuri kau Ruv: "A Rùva-na, źa te xas êl Bakrês, ta te del êk ljako pošom mangê, ta te phandavau ol grapi ande'l zîdurja'l hambarohkê, te na phurdel i balval andrê, kê te na nasvoal mîrrî Buzni haj ka-del ame thud amengê".
O Ruv mothol: "Ni kamau te xau êl Bakrês, kê čajlo sîm!"
Gêli i Phuri kaj Jag: "A Jàga, źa te phabares êl Rues, ta te źal te xal êl Bakrês, ta te del cîrra pošom mangê, ta te phandavau le grapi ande'l zîdurja le hambaroskê, te na phurdel i balval andrê, kê te na nasvoal amari Buzni haj ka-del ame thud amengê."
Mothol i Jag: "Ni kamau te phabarau êl Rues, kê te na ael i cîgna, kê khandel źungales!"
Gêli i Phuri kau Paj: "A Pàja-na, źa te mundares la Jaga, kê te te phabarel êl Rues, kê te del ma zalog pošom mangê, ta te phandavau êl grapi and'l zîdurja le hambaroskê, te na phurdel i balval andrê, kê te na nasvoal amari Buzni haj ka-del ame thud amengê."
O Paj mothol: "Ni kamau te mundarau la Jaga, kê darau te šukjarel ma man!"
Gêli i Phuri kau Guruv: "A Gurùa-na, źa te pjes êl Pajes, kê te źal te mudarel la Jaga, kê te źal te phabarel êl Rues, kê te źal te xal êl Bakrês, kê te del ma cîrra pošom mangê, ta te phandavau êl groapi and'ol zîdurja 'l hambarohkê, te na phurdel i valval andrê, kê te na nasvaol amari Buzni thaj ka-del ame thud amengê."
O Guruv mothol: "Ni kamau te pjau êl Pajes, kê ni sîm trušalo!"
Gêli i phuri kau Kopač: "A Kopàči-na, źa te mares êl Gurues, kê te źal te pjel êl Pajes, kê te źal te mudarel la Jaga, kê te źal te phabarel êl Rues, kê te źal te xal êl Bakrês, kê te del ma cîrra pošom mangê, ta te phandavau êl grapi ande'l zîdurja le hamboroskê, te na phurdel i balval andrê, kê te na nasvaol amari Buzni thaj ka-del ame thud amengê"
O Kopač mothol: "Ni tromau te marau êl Gurues, kê darau lestar, kê detot zuralo-lo!" Gêli i Phuri ka'l Kerme: "A kermàle-lor, źan te xan êl Kopačes, kê te žal te marel êl Gurues, kê te źal te pjel èl Pajes, kê te źal te mundarel la Jaga, kê te žal te phabarel êl Rues, kê te źal te xal êl Bakrês, kê te del ma xancî pošom mangê, ta te phandavau êl gropic ande'l zîdurja le hambaroskê, te na phurdel i balval andrê, kê te na nasvaol amari Buzni haj te del amen thud amengê."
Den anglal êl Kerme: "Ni kamas te xas gadale Kopačes, kê naj gustòso-lo!"
Gêli i Phuri kaj Khajni:" A Khajnije, źa te xas êl Kermen, kê te źan te xan êl Kopačes, kê te źal te marel êl Gurues, kê te źal te pjel êl Pajes, kê te źal te mudarel la Jaga, kê te źal te phabarel êl Rues, kê te źal te xal êl Bakrês, kê te del ma xancî pošom mangê, ta te phandavau le grapi ande'l zîduria'l hambaroskê, kê te na nasvaol mîrrî Buzni haj kadel ame thud amengê."
Mothol i Khajni: "Ni kamau te xau êl Kermen, kê prja xurde-le!"
Gêli i Phuri kaj Bori: "A Borije, źa te pipeis la Khajnja, kê te źal te xal le Kermen, kê te źan te xan êl Kopačes, kê te źal te marel êl Gurues, kê te źal te pjel êl Pajes, kê te źal te mudarel la Jaga, kê te źal te phabarel èl Rues, kê te źal te xal êl Bakrês, kê te del ma xancî pošom mangê, ta te phandavau le groapi ande'l zîdurja'l hambarohkê, kê te na nasvaol amari Buzni haj ka-del ame thud amengê"
I Bori mothol: "Man sî ma but aer bukji ando khêr!"
Gêli i Phuri kau Phuro: "A Phurèa-na, źa te des dab la Borja, kê te źal te pipeil la Khajnja, kê te źal te xal êl kermen, kê te źan te xan êl Kopačes, kê te źal te marel êl Gurues, kè te źal te pjel êl Pajes, kê te źal te mudarel la Jaga, kê te źal te phabarel êl Rues, kê te źal te xal êl Bakrês, kê te del ma cîrra pošom mangê, ta te phandavau le groapi and'ol zîduri le hambaroskê, kê te na nasvaol amari Buzni haj ka-del ame thud amengê!"
Gêlo o Phuro, dja dab la Borja. Gêli i Bori te pipeil la Khajnja. Darajli i Khajni, gêli te xal le Kermen. Darajle'l Kerme, gêle te xan êl Kopačes. Darajlo o Kopač, Gêlo te marel êl Gurues. Darajlo o Guruv, gêlo te pjel êl Pajes. Darajlo o Paj, gêlo te mundarel la Jaga. Darajli i Jag, gêli te phabarel êl Rues. Darajlo o Ruv, gêlo te xal êl Bakrês. Darajlo o Bakro, dja la Phurja cîrra pošom pestar. Phandadjas i Phuri saorrê'l groapi ande'l zîduri le hambarohkê. Djas i Buzni la Phurjakê jek kofa thud pestar.
Bikindjas i Phuri întrego thud godoa le Židovongê, ta pjenas les duj kurkê, thaj maj aśilo. Pokinde la Phurja duj grošuri sonakune.
Gêlo o Rrom o phuro, kindjas duj gurua, panź bakrê thaj pekljas le len san p'eg bust. Dja muj la lumja le themes, aile te xan, te pjen, te bukurisaon.
I me sîmas othe tala'k sinija garado haj sa dikhlem thaj ašundem. Arakhle ma man, thode ma kaj mesjali te xau, te pjau. Xalem aj pilem - pa mîrrê mustêc prastajas, ande mîrrê moste ni arêslo.
Sja tumarja pakjivakê, Rromale śavale!
Lev Čerenkov
Gêlo o phuro, dja dab la borja, haj sja i bukji gêli maj-mišto.
Photo: Moses F. Heinschink
Bild aus Jarovnice
ROMANO CENTRO Nr. 19, 12/1997
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
