|
<
zurück | Deutsch
MULO O LEKSA MANUŠ
katar o Lev Tcherenkov
E bibaxtali vjasta avili andaj Moskva: po 21.5.1997 berš mulo o baro řomano poeto thaj źanglimasko źeno o Leksa Manuš.
O Leksa Manuš arakhadilo ando 1942 berš ando maj-baro foro la Latvijako Riga. Vov sićolas ande la Rigako universiteto thaj kana dja gata pesko sićuvimos kerlas bući sar ek sićaritori ande škola, kaj phirenas but řomane śavore. Paj rig peska daći o Leksa avelas anda poljacicka Řom, kaj trajin ande Istočno Latvija (Lettland), thaj but laśes źanelas te del duma řomanes. Vorta kataj bući ande škola teljardja lesko drom le řomane poetosko haj źanglimaske skritoresko. Vov sas o angluno, savo zumadja te hramol e řomano poezija pe neve forme. Hramosardja ni ģilja pe but řomane dialektur, kaj źanelas le laśes. Nakhadja pe řomani śib but ģilja katar ašunde poetur la lumake - andaj Rusija, Latvija, Ukraina, Francuzo, Italija taj aver thema, ke źanelas but gaźikane śiba. Hramsadja vi but źanglimaske buća paj řomaji śib, historija le Řomengi, paj historija la řomaja muzikači.
 Pala leste aśilo vi aver baro mangin: vov kerdja pe řomaji śib e klasicko poema la Indijaki "Ramayana". Kaća poema pe řomaji taj englezicko śiba sas publikuime ande Indija ando foro Chandigarh ando 1990 berš. Le źene, kaj avile po IV. Řomano kongreso ande Varšava, šaj dikhle kodo lil. Leski paluji bući, kaj andja bari fajda le Řomenge, si o elementaro "Abece romani čhib" palaj řomaji škola ando foro Ventspils ande leska daći phuv e Latvija. Vov kerelas bući vi le diktionaresa (rečnikosa), kaj sikavel sja o barvalimos la řomaja śibako ande Latvija. Naštisardja te del les gata anda kodja, ke astardja les ek pharo nasvalimos.
O Leksa Manuš sas laśo amal le Řomengo haj bute gaźengo. Le źene anda o instituto palaj informacija paša e Źanglimaski Akademija la Řusijaki, kaj vov kerdja bući maj-but sar 23 berš, źi akana seren les thaj den pa leste minti bare tatimasa. Lesko kher sas sa e vrjama puterdo savořenge, kon rodelas ek laśi vorba, kaj te lel pa pesko ilo pharimos.
Gelo-tar amendar 54 beršengo thaj aśadja amen ande bari dukh pala leste, numa meklja amenge pala peste vi baro barvalimos le ilesko. Te avel jerto vi amendar vi le Devlestar.
Photo: Moses F. Heinschink
ROMANO CENTRO Nr. 18, 09/1997
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
