|
<
zurück | Deutsch
O HEDERLEZI KO IZMIRI
katar ki Fatma Heinschink
Akana adaja rat isi sar javin Hederlezi: I ratjate o chaja gidindivona, sare chuvena bari jag. Xutena, kon dzanela tarbuka, dünbeleki marena, khelena, katar ki jag xutena. Kas nane chave, avri k´avlin kerena peske barendar sar kher. Ko rukh talal kerena kunja. Cuvena andre xurdi kukla, kîrpendar kerena ekh kukla. Vakerna: "Re Devlam, adava breš isinom bi-chavengiri ama dzak ko breš t´aven man chave." Ko rukh kerena peske kunja. Kas nane kher, kon isi ko kiras, uština, kerena peske barendar kher. Kon kerela but kavgaz pi romesar, našti ti nakhjon vehat kon isi phivlja, nane len rom - kon isi pi romesar, šukar dzana, lendar angrušni mangena. Ti si phivla, vakerna: "Re Devlam, dzak ko breš t´arakhav mange ekhe romes, ama sar isi von šukar, mej da adikas t´avav mi romesar." Jek rat lende achola odija angrušni. Kaskoro rom isi gene bilacho dzana kaste, kon nakhela pi romljasar šukar, lestar lena angrušni, vakerna: "Dzak ko breš mo rom da t'avel godjaver, sar leste. Šukar ti jašadinas."
Uština sora javinaskoro dünles, gidena cuknides. Ama amare cuknides but phabarena. Lena odule cuknidendar, o khera phirena - ama o chaja, ergena chaja. O ergena chaja phirena o khera, phabarena sarilen, ko jataki kaj sovena. Ama o phure Roma: "Aman, mi chaj", vakerna kaj isi len dukh: "Akathe da, de man cuknidasa", vakerela, "ti nakhel mi dukh." Ko canga, ko dumo, ko phike, kaj isi len dukh, odothe da dindarena pes cuknidendzar.
Sora dzana ki derijav - dzana ki derijav o chaja. Luludja chuvena ki derijav. E luludi t´avela düzi ki derijav, ka lel pi dukhanes. T´avela tersi ti vurtinla o šero lakoro tele - inandinena adalekse - na lela pi dukhanes. Adikas kerena, ondan sora dzana peske ko fari. Ama othe o prandeme, o chave, o romnja, o chaja, sare dzana peske ko fari. Ka dzana ajde, o Roma, o murša pina. O chaja, tarbukes, zurnades, kemanedes, sa oduva fari phirena les, gilendzar, khelimatendzar. Xana, pina, ejlendinena, tamam sora bitinela amaro Hederlezi. Nane adikas but bare Hederlezia. O xoraxaja vakerna adaleske "Cingene Bajrami".
"Re Devlam, adava breš sinom bi-chavengiri, ama dzak ko breš t´aven man chave."
ROMANO CENTRO Nr. 13, 06/1996
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
