|
<
zurück | Deutsch
I DŽENESKIRI ZUJI HEM LESKIRI GODI
(O džono pi zujate sar arakhela kabahatja)
katar ko Paul Parin
Me barilom ki Slovenija eke gaveste. But far nakhenas odule gavestar Roma, bakîrdžides, hem dilendžides. Ki gadžengiri godi hep isine: "O Roma čorena!" Amari hizmekjarkja ka dikhelas i Romen, katar ko šele gidelas o šijes da vakerlas: "Čhavalen, ti kerena frengliki, ka čoren tumen o Roma!" Mej na sinomas lakere godjate, čünki mi daj mo dat isine putarde. Von her zaman vakernas mange: "O Roma isi čorole, ama amendar nane len farki, von da isi džene sar amende!" I Romengere dibiken mangavas. Isine len grasta, džukela, bazi majmunja khelimaskere hem šebekja da.
 Jek maksimi ka barjola, ko maškar ko džene, dikhela: O džene i dženen sar uljavena. Isi maksimi adava uljaipe na lela, čünki i maksimjongoro en angluno okuli isi i daj, o dat, sar sikljardivona. Avrino siklipe isi javer, andruno siklipe isi but javer. I daj, o dat kana isi paše i Romendžar o maksimja da avena paše. Jek maksimi kana lela te axavel pes, po kan ka čhuvola pi giste, ka šunela so vakerela o gi leskoro, axavela uljaimaskoro bilačhipe.
Kana o Hitleri avilo o šoro i themeskoro, odula breša mej isinomas 17 brešongoro. Ozaman dikhlom man medžburi ti dav ma godi uljaimaske, ama na rakhlom jek fajdas. Kon uljavela i dženen, oduva andral barjola, ko čučipe barjarela pes. Mej adale godjate na dikhlom jek fajdas.
Kon uljavela i dženen, von avena jek pareja. Adžikano düšmanliki anela lenge zuranes jek xoljakoro phralipe maškar peste. Von džanena sar ti mučaren i dženen, sar ti len palal, sar ti mudaren i bizuralen. Sar mangena, adikas kerena. I bizuranenge von džanena sar ti arakhen jek manjas.
Džak ko breš 1938 mej isinomas ki Jugoslavija hem okudinavas ko Graz. Odule brešende vakerdivonas "Zigeuner", na dindonas vukos "Roma". Ozaman isine gadže, kon mangelas i Romen, isine kon na mangelas. O Hitleri kana nikaldas o uljaipe ko fanos, bute gadžengiri godi thovdili hem o uljaipe sigo barilo.
Mej axadom, adale uljaimaskere dženen phares ti vurtiskeres len sade lačhe, putarde lafijendžar. Lazimi isi o Roma ma ti muken pes, ti giden pes zuranes ti aven pareja.
(Adava romano teksti isi daha xarno i gadžikaneskiristar. O teksti vurtu les i Fatma Heinschink, Izmiriskire Sepečidengiri čhibate.)
O mangipe hem o axaipe i džonoskoro vurtiskerela i dženes katar ko uljaipe.
Photo: Moses F. Heinschink
ROMANO CENTRO Nr. 13, 06/1996
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
