|
<
zurück | Deutsch
O ČOŘO XORAXAJ ŹAL-TAR ANDE RUMUNIJA
katar o Dragan Jevremović
Sas pe kaj nas pe jek paramič. Sas kodo xoraxaj andaj Turska. Sas les řomni aj sas les inja šavořê xurde. Vo, so ka kêrelas? Źalas, kêrelas bući, anelas po kotor manřo, delas peskê śavořen te xan. But čořo manuš sas. Naj sostar te inkêrdol. Sas les kodă jek bar, kaj kote sejolas peskê padličaja, kolumpirija, krestevec, fosuj - anda soste šaj xal-pe. Ali, jek răt dikhêl vo ando suno, avel leskê jek manuš ando suno aj ka mothol leskê: "Moraja", phenkê, "tu kam aves but barvalo haj baxtalo, te gelăn ande Rumunija, kote si jek prinźando hoteli, kaj sî telaj loza, kaj sî but strugurja kote. Kote te źas, te mangês tukê jek kafa. Kote bari bax aźukerêl tu!"
Vo khanči, dikhlă kodo ando suno, uštilo, mothol peska žuvlăkê: "Źuvlije, kasavi aj kasavi bući me dikhlem suno kasavo: Te źav ande Rumunija, ande´k hoteli, te mangav mangê numa jek kafa, bari bax aźukêrel man." Ali e řomni ka mothol: "Mo, šukar sar suno, katar kodă naj khanči. Ha čačes t´aźukêrel tukê jek bax, naj tu love, naj pe soste źas! Amare śave kam aśen bokhale." Aj vo mekhlă-pe kodolatar. Nakhêl cîra vrăma, pale isto suno dikhé1, kasavo. Pale kodo, manuš avel leskê aj mothol. "Źa inća, bari bax, aźukêrel tu. Či kam aves čořo!" Aj vo, so kam kêrel? Već nakhle trin, štar, panź bêrš, sajek kodo suno dikhêl. Već nakhlo leskê i ande dosada maj but. Vo, so kam kêrel? Hajde aģes-thara, thara-aģes-thara, deš bêrš sajek kodo suno dikhêl. "Źuvlije", phenkê, "me ka źav inća, po makar i xaiv, kê šaj avela i čačes kako suno, ka zumavav!" "Apo", phenkê, "řoma, ka već kames te źas, bićin", phenkê, "kuća bar, ankalav tukê lil haj źa-tar inća!"
Vo kodă i kêrdă. Bićindă kodă bar, lă peskê lil, thodă-pe po vozo, gêlo-tar ande Rumunija. Puślă vo, kaj sî, kodo hoteli, kodo čačes prinźando hoteli ande Rumunija, puśel vo le gaźen, kaj sî kodo hoteli, êl gaźe trade les, kaj sî kodo hoteli inća. Arêslo vo de tharinasa. Kana arêslo vo de tharinasa, dikhêl vo, dă ande kodă bašta andre, čačes sa sar-god, kaj dikhlă ando suno kodo hoteli. Dikhêl opre strugurja, bešlo vo pala astali korkořo ande kodă bašta, akana andre sî gaźe, aj ka del muj le birtašes taj mothol, te anel leskê jek kafa, o birtaš. Kaj o birtaš źanel xoraxanes te kêrel svato, aj andă leskê kodă kafa, meklă kadă p´astali. Vo akana aźukêrel, savi bax kam aźukêrel les kothe, kê već kodo suno de deš bêrš nakhlo leskê ande vîřîcija maj but. So ka kêrel? "So maj aźukêrav", phenkê, "me mora kaća kafa te lav te piav akana." Vo lă kaća kafa, kadă te thol ka muj, perel jek bamba struguro opral ande kafa aj sa šordă kuća kafa, kê peli jek bamba opral! Vov sa śudă i sa pe leste, prskuisardă les kuća bamba. Vo mekhlă kaća kuči, boldă la palpale. "He", phenkê, "sumnala Devla, eta manuš čořo kana sî vo aśel čořo! Dikh", phenkê, "avilem, anda Xoraxanipe ande Rumunija, pala kaća jek kafa, te piav la, haj i kodă naj ma bax te piav!"
Vo asal aj kêrel svato korkořo. More ka dikhêl les kuko kîrčmari inća haj k´avel-tar leste. Ka pušel les: "Ha mo raja", phenkê, "jel vareso naj laśi kodă kafa ili soste tu asasa e akušes tu varêso?" "Na mo manuša", phenkê, "akana kam, phenav tukê čačimos, soste avilem me katka. Naj, e kafa sî, ći me marav muj tutar ili varêso. Ali", phenkê, "kam phenav tukê čačimos, soste avilem katka pala kaća kafa." Ali e kîrćmareskê sas but interesantno, mangel te ašunel, soskê avilo. Phenkê: "Raja, motho-ta kodă, sostar avilăn tu katka pala jek kafa!" "E" phenkê, "raja, me de deš bêrš dikhav ando suno, te avav katka ande tumaro birto, te mangav mangê jek kafa, kê bari bax aźukêrel ma. Aj", phenkê, "eta avilemtar, manglem kafa aj dikh, če bax man aźukerdă ma: čořo sim manuš i kaća kafa", phenkê, "naštisardem te piav la! Me aśav čořo aj čořo! Bićindem muři bar pala kadaja kafa!" aj ka mothol leskê o kîrčmari: "E more," phenkê, "raja, tu san dilo, tu dikhlăn ando suno jek kafa t'aves ande Rumunija te pes aj avilăntar. Pale me but bêrš dikhav ando Xoraxanimos suno isto, dikhav ando Xoraxanimos ande kodo, aj kodo gav, kodo aj kodo khér telaj kodă ogništa pherdo kêzano sumnakaj, galbi! Aj me ći źav," phenkê," ando Xoraxanipe pala, kodo but sumnakaj, kaj dikhav suno sa-jek. Aj tu dikhlăn suno pala jek kafa haj avilan-tar katka," phenkê, "tu či san normalno!"
Ali kako aśel aj ašunel, so mothol leskê o kîrčmari, opisil lesko khêr, lesko gav! A vo aśilo, aśilo aj thol sama le kîrčmareskê, sar o kîrčmari phenel: ande če gav, kodo sî lesko gav, sar o khêr amnal, dikhel vo, kê lesko sî kodo khêr. Ali vo či mothol ka kîrčmari khanči. "Apo eta," phenkê, "me simas dilo, avilem pala jek kafa. Anda khančeste bićindem muři bar, aśile muře śave bokhale. "So kam kêrel vo, amalalen? Del-pe vas kodole kîrčmaresa: "Dobro mo, aś Devlesa, raja! Źav-tar mangê khêre, te pravarav muře śavořen." Kaj gêlo-tar khêre, kaj řomni aj mothol la řomnăkê, sar nakhlo ande Rumunija, so sas kodola kafasa aj so kodo kîrčmari leskê phendă. Kana sas, vo lă peska řomnăsa hunadă kodă ogništa, kaj kêrdŏl-pe jag kothe, vazdel jeg baro bař, tela kodo bař pherdi kakavi sumnakaj! Aj kadă vo barvajlo. O suno tradă les ka kuko manuš, kon źanglă anda kodo sumnakaj, kê kodo barvalimos sas ande lesko khêr aj vo či źanglă anda kodă, leskê śave bokhale sas, trušale, nas so xan. Anda kasavo barvalimos, so s´ando khêr aj vo či źanel. O suno tradă les inća ka kuko manuš, kaj źanglă anda kodo barvalimos, kaj sas garado ande lesko khér. Aj kadá vo barvaflo!
Vazdel jeg baro bař aj čačes tela kodo bař pherdi kakavi sumnakaj!
ROMANO CENTRO Nr. 12, 03/1996
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
