|
<
zurück | Deutsch
PARAMIČI PAJ BAXT
katar o Miša Nikolić
Ande purani vrjama sas jek phuro rom taj sas les duj šave. De o phuro rom sas vi phuro taj vi nasvalo. Jek ģes las sama o phuro, kaj si te merel, taj kade akhardas peske šaven peste taj phendas lenge: "Sunen šavalen, me na pa buteste si te merav, anda kodo akhardem tumen, te dopašarav tumenge sa, sogodi si ma." Kade las taj das len sa, sogodi so sas les, vorta dopaš jekeske, dopaš avereske: vi love, vi kher, vi e phuv taj sa sogodi dopaš dopaš. De pala kodo vi mulas o phuro rom.
Pala kodo o maj phuro phral las peske jekha romnja taj žalas leske sa po mišto. Lašardas vi o kher taj vi pe leski phuv, sogodi šuvelas ande phuv, sa mišto barjolas: o ģiv, o kukurizo, e krompirja, e salate. Pe leske kopača, so sas ande bar, barjonas e maj laše phabaja, e maj laše ambrola, e maj šukar taj maj laše pruni. Leske bale sas mišto thuljarde, leske gras, leske guruva, leske khanja sas sa saste taj zurale. Pa jek berš das les o Del vi šejori, taj bušolas Milica.
De o maj terno phral, bušolas Petre, numaj kodo, de sar mulas lesko dad, leske žalas sa o trajo maj nasul. Taj sa maj nasul kade, ke musaj sas leske sa te bićinel, sogodi so sas les, te šaj te trail. Feri ašilas leske e phuv taj o dopaš anda kher, so muklas leske lesko dad. Jek ģes uščilas pe detharin taj las te rovel taj korkoro peske phendas: "Ax Devla, sar kerdan kado anda mande, hod mure phraleske kade mišto žal taj či žanel ando barvalimos taj ando mištimos so te kerel, taj me kade čorajlem ta naj ma, kaj muro šero te šuvav, či jek šerand či ašilas ma, te sovav pe leste. Numaj musaj mange tele pe phuv te sovav taj mure čore zubunosa te šaravav ma."
Taj phendas ke musaj vov, te žal te rodel e Devles taj te pušel e Devlestar, sostar o Del das les kasavi čori baxt. O aver ģes getosajlo, las peske jek trasta taj šutas andre cera mandro taj ćiral, so das les leski bori taj teljardas te rodel e Devles. Kade gelas jek intrego ģes taj jek rjat. O dujto ģes pe raći ćinilo taj sas vi lindralo taj kamlas varekaj te šaj te sovel taj hodinil-pe e bare dromestar. So pe raćin dikhel jek kher, kaj phabolas jek lampa, taj kade mardas po udar, te muken les andre ando kher. Avilas jek terno manuš taj muklas les ando kher. No so dikhlas o Petre kote? But čudisajlo kodolestar, so dikhlas. Ando kher sas inke duj terne rakle taj po bov ćiravenas ande jek bari bari piri xaben. Pala bov pale, tele pe phuv bešelas jek phuro manuš taj jek phuri gaži. De kana sas gata o xabe line e trin rakle ta šute e piri pe mesalja taj line te xan kade žungales, sar e bale kana si maj bokhale taj e kokala šudenas e phureske taj a phurjake kote pala bov. O phuro taj e phuri lenas e kokala taj kodo xanas, so pe kokala inke ašilas. De e rakle kana sa xaline, so sas ande piri, atunči bešle tele te pušen katar si o Petre, kon si vov taj katar avel taj kaj žal.
Kade o Petre phendas lenge peski istorija, so sas ta so si, taj phendas lenge, ke anda kodo žal, te rodel e Devles, te pušel lestar, sostar das les o Del kasavi čori baxt. Kade sutas lende kodi rjat taj pe deteharin teljarelas te žal maj dur. De pe kodo phendas leske o maj phuro andaj trin rakle: "Petre, trail tu o Del, jokhar te resesa ka sunto Del na bister, te pušes les vi pa amende, sostar amen keći but xas taj šoha či sam čaje." Pe kodo phendas o Petre: "Ci bistrav taj pušava les pa tumaro bajo!"
(Maj dur ando aver brojo.)
...Phendas, ke musaj vov, te žal, te rodel e Devles taj te pušel e Devlestar, sostar o Del das les kasavi čori baxt.
ROMANO CENTRO Nr. 09, 06/1995
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
