|
<
zurück | Deutsch
E PHURESKORO KHER LONESTAR
O Maharemi kotar i Priština
Sine kaj sine. Sine jekh phuri hem jekh phuro. E phureskoro kher lonestar, a e phujrakoro kher šahendar. E ama sigo avol an i paramisi, del jeg baro buršim, e phureskoro kher bilavol.
 So te kerol akana čororo phuro? Nae kaj te ğal! Ačhilo an o sokakja, avri ačhilo. Vurtinol-pe, tele-upre, akatar-okotar. Nae kaj te ğal!
Ğal kor(i) akaja phuri. "Aman-duman!" rovol, "mori phurije," phenol, "ka-muke li man an o ko kher?" -"A na," phenğa, "phureja, našti mukava tu ano mo kher!" - "Ma, mori phurije," phenğa, "dinğa buršim. Ake," phenğa, "perağa mo kher." - "Pa sostar, bre phureja, sine ko kher?" - "Ah, bre phurije, mo kher sine kotar o lon."
"A vala, me našti mukav tu!" - "Aman, bre phurije, muk man!" Uštol akaja phuri-da, mukol ole okothe an o kher. O azdinja, o phuro.
Phenol: "Phurije, phurije, ka-muke li man pal o koftori, odothe te bešav, te taćovav?" - "A na!" - Phutije, phutije, e Devleskire hatireske, ka-muke li ma?" - "Ake hajde," phenğa, "nakh odothe, beš!"
"Phurije, phurije, ka-buljare li mange O düšeko?" Akaja-da phenol: "Oh, sar odova k´ovol, te buljarav tuke düšeko?" - "Ako bre phurije, te manglan man!" - "Ah," phenol, "me na mangav tu, nego," phenol, "ake adjahar," phenol, "sevapiske ka-buljarav tuke!" Neise, buljarol leske o düšeko.
"Phurije, phurije, ka-učhare li ma o jorgani?" - Vala na!" - "Ka-učhare li ma, bre phurije?" - "Hajde!" Učharğa ole o jorgani. "Phurije, phurije, te avav li uzaro ko dumo?" - "Na, na, lağavo!" - "Mori phurije, te avav li uzaro ko dumo?" - "Hajde, ava!" Nejse, akava o phuro, alo olake uzar o dumo.
"Taćarav li tu, bre phurije?" - "Valahi," phenol, "phureja, dosta!" - "Čak lila ma tatipa, kothar taćare ma!"
Nejse. Sigo odothe keren jeg biav, jek šukaripa. E phuraha o phuro źeninol-pe.
Odori lošnipa, ki amende šukaripa!
Akija paramisi mothoğa o Muharemi Redžep an o auvgusto 1971 an e Priština.
Sigo odothe keren jeg biav, jek šukaripa. E puraha o phuro źeninol-pe. Odori lošnipa, ki amende šukaripa!
ROMANO CENTRO Nr. 06, 09/1994
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
