|
<
zurück | Deutsch
O RAŠAJ TAJ O BENK
katar o Karl Nitsch
Sas ka nas. O sunto rašaj ando gav taj igen e romnjanca kerlas taj žuvljanca, taj ka nasul sas, avilas o benk te igrel les. Taj gero rašaj dikhel e benges. Ale vo leske: "Muro sunto bengona, na ker manca će fogaša! Naštik mukesas maj dur te trajij? De ma inke ek proba!" "Ja, muro rašaj, dap tu variso te šaj trajis maj dur. De, sikhav mange kodo, so šoha či dikhlem! Tehara dopaš araćako si te sikhaves mange, te na žanesa, atunči si te igrap tu!"
 No gero rašaj naškerel, rodel, pušel, dikhel. Ka rakhlas s´o benk šoha či dikhlas? Zal ka peski thuli gaži so žutij les, so kiravel leske. Sas ande late šel-biš kili! Kaj? Či kodi, či žanel khanči. Maj ande peski nevoja žal me vi ande, kaj gečka ando štalovo. Dikhel pi gečka. So phenla leske e gečka? Kaj žanla e gečka, či žanel či te vorbij!
No, aba avelas i dopaš rat. Sas aba dopaš dešudu, inke či žanel! Ecerca del leske ande goģi. Našel ande konha ande, kaj peski gaži, šol la tista, tista nanges. Igrel la ka e gečka ando štalovo. Lel i gečka avri anda štalovo. Šol e gajža pe štare pe vast taj pume, pe štarende kote, taj šol o lanco ande kori. No taj igrel la gečka taj garavel la. No vorta o časo malavel e dešudu: "Bem!", ecera kate aba o benk. "No muro rašaj, rakhlan aba, so šoha či dikhlem?" - "Jo, či žanav muro raj-benga! Ap taj dikhta, soj kado?" Žal lesa ande gečkako štalovo. O benk dikhel: Jekfar dikhel palal jekfar dikhel anglal. Taj kerel e šeresa. Pale dikhel anglal pale palal. Kerel e šeresa: "Joj rašaja, kecava gečka meg trajij šoha či dikhlem! Aj soski gečkaj kadi? Aj lake čuča anglal i taj lake mustaca palal! Aj maj dur traindan njerindan ma! No muk t´ašos kate! Aš Devlesa!" Taj gelastar. Taj gero rašaj, te na mulas, ž´aģes inke trajij.
 Kaća paramič phenģa mange o Karl Nitsch angla biš bêrš. O Karl Nitsch sas lovari anda´l purane, ašunde Rom. Vo sas člano ando Romano Centro. Bezex sî, kaj aśilăm bi lesko. Vov mulo anglal 3 śon. Vov sas jek goģaver, čačo thaj but laśo amal. Bute źenengê aźutilas vi vorbenca vi lovenca. Lesa xasardăm jekhe laśe amales. Lesko than aśela nango. Te del o Del, te avel leskê phuv loki.
(Mozes Heinschink)
Amengê sî but pharo anda amara źeno (člano) Karl Nitsch kaj mulo 30.11.93. Te avel jerto lesko ģi.
Photo: Renata M. Erich, Dragan Jevremović, Paul Meissner
ROMANO CENTRO Nr. 04, 03/1994
|
|
 |
ROMANO CENTRO
2001
2000
1999
1998
1997
1996
1995
1994
1993
|
|
