|
<
zurück | Deutsch
SOSTE DALE BIJANDÀN MA?
O Dragan o le Trumpesko, Wien 1991
Soste dale bijandán ma?
Soste Devla Rom kerdàn ma?
Maškar o them naštiv zav.
Muŕo than katende naštiv arakhav.
Kaj te źav, kaj te aresav,
Mora lokes taj čoràles te phurdav.
Muŕo jilo rovel ando kolin,
Ke phandado thaj vulime
sar jek patrin.
Me sim Rom, koģa mišto źanav,
Ali jek bući me či haćarav,
Sar god ke sim jek nekazo,
Bi šeresko, bi kanengo,
Bi nakhesko, bi vastengo,
Pe khančeste či amnav,
Mora mange te laźav,
Te garaģov te našav.
Me but vràma gyndosardem,
Anda ´g data trgnajlem,
Pe oglinda prastajem,
Dikhav man, dikhav gaźen,
So man naj so si len?
Si man trupo manušesko,
Či sim o śav le bengesko.
Me atunča uštilem,
O naj po čikat thodem.
Koģa vràma de mult sas,
Kaj mora sas te daras,
Te garaģos te našas.
Akana sam baxtale,
Ke avile aver gaźe.
Či maj trubul te daras,
Šaj te trajis sar kamas,
Thaj te mothas so źanas!
O Romale źi kaj soven?
Kastar daran, so či ušten?
Thaj te mothon so kamen!
Sî kon te ažutil amen.
Mora i amen zor te das,
Savo zydo te paŕavas?
Čačo drom te arakhas,
Amaro phandalo kolin
te pytras!
Ćiden moćo, ćiden zor,
Te čačes anklàs po gor!
Amare vas pyterde,
Najis Devleske,
ažutin amen vi el gaźe
Te avas maj baxtale!
O Centro o Romano kamel tumenge but bax, sastimos, zor taj volja laśi, pe sama e rromanji!
ROMANO CENTRO Nr. 01, 06/1993
|
