|
<
zurück | Deutsch
O ROMANO CENTRO
Amari organisacija teljarda te kerel bući 1991 numa pe romaji sama aj vi gaźenca save kamen te aźutin amen.
Ande amaro presidijumo sî 8 źene:
O presedniko: Ilija Jovanović
Mozes Heinschink, Ceija Stojka, Branislav Jevremović, Ernö Jonas, Dr. Ursula Hemetek, Helene Kleewein, Renata M.Erich
Generalno Sekretari: Dragan Jevremović
Amaro birovo sî puterdo: Luja-Paraštuj, 14-18 h
Amari adresa: Romano Centro, Schneidergasse 15A, 1110 Wien, Tel. 7496336
 Ande kaća vràma aźutis so šaj anda socijalno problemo. Amaro aźutimos keras ivja, bipoćinimasko. Angla mizmeri źas thanende ka le raj, kaj trobun te aźutin le romen.
Amen či sam o Del, te šaj aźutis ando svako fàl. Najis Devleske, źi akana kerdàm but, taj aźutisardàm bute źenenge. Pala kulturake buća s' amen jek than ando Wielandgasse. Le rom šaj keren peske slave, gostij, krisa, thaj maj cîne abàva. Kata le but kulturake buća so kerdam:
Avral o Beči dàm duma pa romanji śib, romanji muzika aj romani kultura (Berlin, Saloniki, Graz, Innsbruck) arakhlàm but romane muzikake grupe le gaźenge kaj rode amendar.
Kerdàm romano balo ando Ungro. O André Heller rodija katar o Romano Centro aźutimos pala peski bući ,,Magneten". Arakhlàm leske muzika andal maj but thema.
O Ernö Jonas sikhadà ando Ammerlinghaus svako paraśuji tradicijinalo romano khelimos. Aj kerda vi "Workshop" ando Ammerlinghaus pala o programo "Reisende auf dieser Welt".
Dr. Ursula Hemetek kerdja jek dokumentacija pala "Romane gilà" ande Austrija.
Amen inkeras amari śib. O Mozes či mekel te bisterdol. Vov źanel but pa kodo aj ramol le vorbe romaja ande lila te na xasavon, aj nakhavel paramiča taj gilà paj romaji pe gaźikaji, vaj paj gaźikaji pe romaji śib.
Ande svako lil "Romano Centro" kam thas jek romanji paramici.
Jek delegacija anda "Romano Centro" geli po baro kongreso, ande Rumunija, ando Bukarest. Pale jeg delegacija, anda "Romano Centro" geli ande maj but thema (Beograd, Bratislava, Zakopane, Budapest) peske lovenca (pe pesko troško).
Jekh amari delegacija sas maj butivar ando "Bundeskanzleramt" pala o "Anerkennung" le romengo sar narodoski grupa.
O "Romano Centro" sajek del informacije po radio, pe lila (novine, gazete) taj i pe televizija. Amen či mekas le gaźe te den xoxavne informacije pal rom.
Po gor kakale śonesko le 26.6.1993 kam avel jeg baro Romano Festo: O anav la paćivkako kam avel "T' aven baxtale". Sî amen bad volja, te malados tumenca inća.
Romano Centro: Luja-Paraštuj: 14-18 h
Amari adresa: Romano Centro
Schneidergasse 15 A, 1110 Wien
Telefona: 7496336
Photos: Gerhard Maurer, Robert Newald
ROMANO CENTRO Nr. 01, 06/1993
|
